4 წლის დაჩი ხრიკაძე:
კანფეტები და შოკოლადები საჭმელზე მეტად მიყვარს. ამიტომ, დედიკო ტკბილეულს რომ ყიდულობს ჩემთვის, ძალიან მიხარია. სათამაშოებიც მახარებს! ზაფხულში ბავშვებთან ერთად თამაშიც და შიშველი სიარულიც მიხარია. აუზზე რომ დავდიოდი და ტიტლიკანა ვიყავი, ესეც მიხაროდა. კიდევ იცით, რა მიხარია? დაბადების დღეებზე სიარული, მაგრამ ხანდახან ვმორცხვობ.
6 წლის ნიკა შარაშიძე:
სტადიონზე წასვლა, კომპიუტერით თამაში, ტელევიზორის ყურება და ცეკვა მიხარია. არ დავდივარ ცეკვაზე, მაგრამ ინტერნეტში ვუსმენ მუსიკებს და ვცეკვავ. დაბადების დღის ცენტრებში სიარულიც და ახალ წელს საჩუქრები მახარებს!
5 წლის სესილი მარჯანიძე:
ბარბი და პრინცესა სოფიას დანახვა ძალიან მიხარია! ბაბუმ ხის სახლი გამიკეთა, აგურებიანი შპალერით, რაც ძალიან გამიხარდა! დედიკო რამე სათამაშოს ან მამიკო ტკბილეულს რომ მომიტანს, ესეც მიხარია! ბავშვებს დაბადების დღეებზე სიარულიც გვიხარია!
7 წლის გიორგი დავლიანიძე:
ჭადრაკში თამაშს რომ ვიგებ, ყველაზე მეტად მიხარია! არდადეგების დაწყებაც მახარებს, რადგან დასასვენებლად მივდივარ. კიდევ მიხარია, როცა დედიკოსთან ერთად ტელევიზორში მულტფილმს ან კინოს ვუყურებ. ელექტროსათამაშოებზე ვგიჟდები და დედიკო ხშირად მიკეთებს საჩუქრებს. ჰოვერბოდრი, პულტიანი მანქანა, სკუტერი, დრონი... იმდენი რამე მიყიდეს, გეგონება, ქორწილში ვიყო!