- ხატია, ახლა რას საქმიანობ?
- მაქვს საკუთარი სალონი არაყიშვილზე. ამჟამად ჩემი ძირითადი საქმიანობა ეს არის - რა თქმა უნდა, ბავშვების შემდეგ.
- რა ასაკში გახდი დედა?
- 30 წლის ვიყავი და ვფიქრობ, რომ ეს ზუსტად ის ასაკია, როდესაც უკვე მზად ხარ დედობისთვის. მანამდე ალბათ ჯერ კიდევ არ გაქვს გაცნობიერებული ის პასუხისმგებლობა რასაც დედობა ჰქვია. უბრალოდ, პირველ შვილზე ძალიან დაფეთებული ვიყავი, ყველაფრის მეშინოდა. მეორე შვილზე უფრო დავიხვეწე და მესამეს უკვე სრულიად მზადყოფნაში შევხვდი.
- რა არის შენთვის დედობა?
- უდიდესი პასუხისმგებლობა! ძალიან მიყვარს, როცა ჩემი შვილები მოწესრიგებულები არიან და სუფთად გადიან სახლიდან. როცა მოუწესრიგებელ ბავშვს ვხედავ, ყოველთვის მგონია, რომ მშობელი აკლებს ყურადღებას. ჩემთვის მნიშვნელოვანია, ბავშვებმა აქედანვე შეიყვარონ სწავლა. ბაღშიც ისეთში შევიყვანე, სადაც პატარა ასაკშივე ასწავლიან უცხო ენას, დგამენ სპექტაკლებს. ასევე დამყავს „ბასტი-ბუბუში“, რომელიც ძალიან მოსწონთ. ნაბიჯ-ნაბიჯ მივყვები ჩემი შვილების განვითარებას.
- რა დროს უთმობ შვილების აღზრდას?
- მე და ჩემი ქმარი ვცდილობთ, შაბათ-კვირა მთლიანად ბავშვებს მოვახმაროთ. დანარჩენ დროს დაკავებულები არიან.
- ვინ გეხმარება?
- მყავს არაჩვეულებრივი 2 ძიძა. ორივეს საკუთარივით უყვარს ჩემი შვილები. ჩვენი ძიძები, ფაქტობრივად, ოჯახის წევრები არიან.
- რას უკრძალავ ბავშვებს?
- თავხედობას... ჩემი აზრით, როცა ბავშვი უზრდელია, ამაში მშობელია დამნაშავე. ყოველთვის ვცდილობ, ჩემს შვილებს შენიშვნა ისე მივცე, რომ მიიღონ და გაითავისონ.
- რას უსურვებდი საკუთარ შვილებს?
- მინდა, რომ რეალიზებული ქალები იყვნენ, კარგი ბავშვობა ჰქონდეთ და ისეთივე ბედნიერი ოჯახები შექმნან, როგორშიც თავად დაიბადნენ.