განსხვავებული „სომხური ქადა“

პურის საწარმო „იბერია 2012“, ეკოლოგიურად სუფთა პურ-პროდუქტის გარდა, რომელიც „იმერიონის“ ლოგოთი გამოდის, უგემრიელეს ნამცხვრებსა და ფუნთუშებსაც აცხობს.
წარმოების ტექნოლოგი რუსუდან ანდრიაძე „funtime“-ის მკითხველებს უგემრიელესი „სომხური ქადის“ საკუთარ რეცეპტს გთავაზობთ.

ცომის ინგრედიენტები:
მარგარინი - 600 გრ
ფქვილი - 1 კგ
ლიმონის მჟავა - ჩაის კოვზის მესამედი
მარილი - ჩაის კოვზის მესამედი
ზეთი - 70 გრ

საშუალო ზომის ჯამში ჩაყარეთ ფქვილი.
დაუმატეთ მარილი, ლიმონმჟავა, ზეთი და იმდენი წყალი, რომ საშუალო სისქის ცომი მოიზილოს.
გამზადებული ცომი გაყავით სამ ნაწილად.
თითოეული ნაწილი გააბრტყელეთ და წაუსვით 200 გრამი მარგარინი.
ზოგი დიასახლისი მარგარინს აციებს და შემდეგ ცომზე სახეხის დახმარებით ახეხავს, მაგრამ ჩვენ დარბილებულ მარგარინს ვამჯობინებთ.
მარგარინის წასმის შემდეგ  ცომი კარგად დაკეცეთ და ნახევარი საათით მაცივარში შეინახეთ.
შემდეგ გამოიღეთ და ისევ გააბრტყელეთ - ამჯერად, მარგარინის წასმა საჭირო არ არის, უბრალოდ, გააბრტყელეთ, დაკეცეთ და ისევ მაცივარში შეინახეთ.
ცომის სამივე ნაწილის სამჯერ გაბრტყელებისა და მაცივარში ვიზიტების შემდეგ, შეგიძლიათ, ცხობას შეუდგეთ. გაითვალისწინეთ, რომ ეს ფენოვანი მაცივარში 24 საათის განმავლობაში შეგიძლიათ შეინახოთ და ცხობა თქვენთვის ხელსაყრელ დროს დაიწყოთ.

ქადის შიგთავსის ინგრედიენტები:

კარაქი ან მარგარინი - 250 გრ „უსტამი“ ან „სოფტი“
ზეთი - 50 გრ
შაქარი - 500 გრ 
ფქვილი - 500 გრ 
ვანილი

ტაფაზე დაყარეთ ფქვილი და დაბალ ცეცხლზე ოდნავ „მოხალეთ“.
ფქვილი ფერს რომ შეიცვლის, დაუმატეთ შაქარი, კარაქი, ზეთი, ვანილი და კარგად მოურიეთ.
ქადის გულსართი მზადაა.  

ქადის მომზადება:
ცომის თითოეული ნაწილი გააბრტყელეთ და მიეცით მოგრძო ფორმა.
დააყარეთ ქადის გულსართის  მესამედი, გადაახვიეთ და დაჭერით თქვენთვის სასურველ ნაჭრებად.
გამოაცხვეთ ზომიერ ცეცხლზე და ცხობის დასრულებისას, თავზე გადაუსვით რძეში ან წყალში ათქვეფილი კვერცხის გული.
გემრიელად მიირთვით!