„ღამის სერენადები“ 1982 წელს, ლიანა ისაკაძის ინიციატივით, საქართველოს უმშვენიერეს მხარეში - აფხაზეთში დაარსდა და 8 წლის განმავლობაში ბიჭვინთაში დიდი წარმატებით ტარდებოდა.
სამწუხაროდ, 1991 წელს ფესტივალმა არსებობა შეწყვიტა და მხოლოდ 18 წლის შემდეგ - 2009 წელს - ისევ შავი ზღვისპირეთში, ბათუმში განახლდა.
ფესტივალისადმი წლების განმავლობაში არსებულმა დიდმა ინტერესმა განაპირობა გეოგრაფიის გაფართოება: 2014 წლიდან „ღამის სერენადებს“ პარალელურად თბილისიც მასპინძლობს, 2015 წლიდან ბათუმი-თბილისის საერთაშორისო ფესტივალი ეწოდა.
წელს კი „ღამის სერენადები“ ანაკლიაშიც აჟღერდება - ეს იქნება ლიანა ისაკაძისა და მისი მეგობრების მუსიკალური გზავნილი აფხაზეთში, სადაც ფესტივალი დაიბადა.
საფესტივალო საღამოები გაიმართება:
27 და 28 აგვისტოს - ბათუმში სასტუმრო „ჰილტონის“ დარბაზში;
30 აგვისტოს - ანაკლიაში, ღია ცის ქვეშ;
2, 3 და 4 სექტემბერს - თბილისში. დედაქალაქში კონცერტებს უმასპინძლებს სასტუმრო „ბილთმორი“ (2 სექტ.); რუსთაველის თეატრის მცირე დარბაზი (3 სექტ.); თბილისის ოპერისა და ბალეტის თეატრი (4 სექტ.), სადაც ლიანა ისაკაძის იუბილესადმი მიძღვნილი საღამო და გალა კონცერტი გაიმართება.