ერთი შეხედვით, მათი სიყვარულის ისტორიაში უჩვეულო არაფერია: ერთმანეთი საერთო მეგობრის დახმარებით გაიცნეს. მალე სიმპათიები გაჩნდა, პირველ პაემანს მეორე მოჰყვა და გაცნობიდან ცხრა წლის შემდეგ დაქორწინდნენ, თუმცა წარმოდგენა არ ჰქონდათ, რომ ერთმანეთს დაბადებიდან იცნობდნენ.
ჯესიკა დარწმუნებულია, რომ მისი ქმარი მსოფლიოში საუკეთესო ადამიანია. აარონი კი ფიქრობს, რომ ისინი შესანიშნავად ავსებენ ერთმანეთს და ერთმანეთისთვის არიან შექმნილნი.
წყვილმა ნაცნობობის პირველივე დღეებში გაარკვია, რომ ერთ დღეს - 1990 წლის 28 აპრილს დაიბადნენ და ერთმანეთს ბევრ რამეში ჰგვანან. დაქორწინების შემდეგ კი ბავშვობის ფოტოები დაათვალიერეს და აღმოაჩინეს, რომ ერთ ქალაქში და ერთ სამშობიაროში მოევლინნენ ქვეყანას.
აარონმა მაშინვე დედას დაურეკა და დაწვრილებით გამოჰკითხა დაბადების ადგილის, დროისა და გარემოებების შესახებ.
როგორც გაირკვა, აარონის დედას მშვენივრად ახსოვდა ჯესიკას მშობლები. ქალმა ისიც კი გაიხსენა, როგორ „გააცნეს“ მომავალმა მძახლებმა ერთმანეთს ახალშობილები.
ჯესიკას ბებიამ გოგონას ბავშვობის ფოტოებთან ერთად შენახული გაზეთიც იპოვა, რომელსაც მისი შვილიშვილის დაბადების ცნობა ჰქონდა შემონახული. აღმოჩნდა, რომ იმ დღეს და იმ სამშობიაროში მხოლოდ აარონი და ჯესიკა გაჩნდნენ და ადგილობრივმა გაზეთმა მათი დაბადების ცნობა გვერდიგვერდ გამოაქვეყნა.
- ვფიქრობ, ეს ბედისწერაა“, - დარწმუნებულია ჯესიკა.
- მე კი მგონია, რომ ბედისწერაზე მნიშვნელოვანი ადგილისა და დროის დამთხვევა უნდა იყოს, - ამბობს აარონი.