სახელი: მიშა
გვარი: ხაჩიძე
სამუშაო ადგილი: ტელეკომპანია „მაესტრო“.
რომ არ ვყოფილიყავი ჟურნალისტი, ვიქნებოდი... მფრინავი, ჩემი ბავშვობის ოცნებაა.
ყველაზე მეტად ჩემს პროფესიაში მომწონს... ის ადრენალინი, რაც ჩვენს ყოველდღიურ საქმიანობას ახლავს. მსოფლიო ამბების ეპიცენტრში ყოფნა.
ყველაზე დასამახსოვრებელი რეპორტაჟი... ყველა ჩემი რეპორტაჟი დასამახსოვრებელია, ყველაფერს ვაკეთებ მთელი შემართებითა და მონდომებით და, შესაბამისად, ერთს ვერ გამოვყოფ.
ადამიანში ყველაზე მეტად ვაფასებ... გულწრფელობას, ერთგულებას.
ნიჭი, რომელსაც მინდა ვფლობდე... წინ აღვუდგე მოსალოდნელ უბედურებას. ცუდი კარგით შევცვალო.
წიგნი, რომლის ავტორიც ვიქნებოდი... ძალიან ამბიციური ვიქნები და ვიტყვი - კამიუს და კაფკას რომანები.
ფრაზა, რომელსაც ყველაზე ხშირად ვიყენებ... საუბარში ძალიან ბევრ უცენზურო სიტყვას ვიყენებ, ცუდი ბიჭი ვარ! (იღიმის)
ვტირი მაშინ, როდესაც... მამაკაცები არ ტირიან (იღიმის).
მრცხვენია მაშინ, როდესაც... მაქებენ. ამ დროს თავს უხერხულად ვგრძნობ.
ყველაზე მეტად მიყვარს... ის...
სიყვარული არის... ყველაფერი უთქმელობაში გამოხატული.
დღევანდელი დღე არის გარანტი იმისა... დღევანდელი დღე არის გარანტია იმისა, რომ არ არსებობს გარანტია.
ოქროს თევზს ვთხოვდი... ოქროს თევზი არ არსებობს, ზოგადად, ვერავის ვერაფერს ვთხოვ (საკუთარი თავის გარდა).
ადამიანი რომ არ ვიყო, ვიქნებოდი... ოქროს თევზი, ყველას აგისრულებდით სურვილებს.
პრეზიდენტი რომ ვიყო... ვიქნებოდი სურვილით ლიბერალი, რეალობით დიქტატორი.
წინა ცხოვრებაში ვიქნებოდი... მწერალი.
ჩემთვის ღმერთი არის... სიმშვიდე.
რწმენა არის... იმედი.
ვენდობი... სამწუხაროდ, ყველას.
თავისუფლება არის... ამ კითხვაზე მუდამ ჰეინრიხ ჰეინეს ცნობილი ციტატა მახსენდება: „Die Freiheit ist eine neue Religion, die Religion unserer Zeit“ (თავისუფლება არის ახალი რელიგია, რელიგია ჩვენი დროისა).
ვიცეკვებდი... სიამოვნებით ვიცეკვებდი სირტაკს ენტონი ქვინთან ხელგადახვეული.
ომი არის... ედუარდ მუნკის „კივილი“.
მშვიდობა არის... დროებითი.
იყო პატრიოტი, ნიშნავს... იყო უიშვიათესი.
ტექსტი მოამზადა ელიზავეტა გეგეშიძემ.
გადაღების ადგილია „ლიტერატურული კაფე“.