მეცნიერებმა დაადგინეს, რომ საზოგადოებისთვის ცნობილი ადამიანების სუიციდის ფაქტების მედიით გაშუქება თვითმკვლელობის სტატისტიკაზე ნეგატიურად აისახება.
მკვლევარების ყურადღება მიიქცია იმ ფაქტმა, რომ 2014 წლის შემოდგომაზე ამერიკაში სუიციდის შემთხვევებმა იმატა. მეცნიერებმა ეს ფაქტი 2014 წლის 11 აგვისტოს პოპულარული მსახიობის რობინ უილიამსის თვითმკვლელობას დაუკავშირეს.
ამ ტრაგიკული შემთხვევიდან ხუთი თვის მანძილზე ქვეყანაში სუიციდის მაჩვენებელმა ჩვეულებრივს 10%-ით გადააჭარბა. მეცნიერების აზრით, ამ შემთხვევაში გადამწყვეტი როლი ტრაგედიის უპასუხისმგებლო გაშუქებამ შეასრულა.
კვლევის ავტორების თქმით, ჯანდაცვის მსოფლიო ორგანიზაციის მიერ დადგენილი ეთიკური ნორმებისა და რეკომენდაციების საპირისპიროდ, რობინ უილიამსის გარდაცვალება მეტისმეტად დეტალურად და ზედმეტად რომანტიზებულად იქნა აღწერილი.
მეცნიერებმა შეისწავლეს თვითმკვლელობების სტატისტიკა 1999 წლის იანვრიდან 2015 წლის დეკემბრამდე და დაადგინეს, რომ 2014 წლის აგვისტოდან ასეთმა შემთხვევებმა მკვეთრად იმატა.
მეცნიერების განმარტებით, მედიას შეუძლია, ამგვარი ფაქტების გაშუქებისას, როგორც დადებითი, ისე უარყოფითი როლი შეასრულოს. მაგალითად, 2009 წელს რეალითი-შოუს ბრიტანელი ვარსკვლავის ჯეიდ გუდის საშვილოსნოს კიბოთი გარდაცვალების შემდეგ, ონკოლოგიური დაავადებებზე გამოკვლევების ჩასატარებლად, ჩვეულზე 400 000 ქალით მეტი მივიდა, თუმცა ეფექტი ხანმოკლე აღმოჩნდა.