ამერიკის ერთ-ერთ ციხეში პატიმრების მორიგი სეირნობის დროს, ციხის ბადრაგს გულის შეტევა დაემართა და მიწაზე უგონოდ დაეცა. იქვე მყოფ ექვს პატიმარს თავისუფლად შეეძლო ოფიცრის ცეცხლსასროლი იარაღი აეღო და იქვე მდგარი ავტომობილით ტერიტორიას გასცლოდა, მაგრამ გაქცევის ნაცვლად, ექვსივე პატიმარმა ბადრაგის გადარჩენისთვის ბრძოლა დაიწყო.
ერთ-ერთმა პატიმარმა უგონოდ მყოფ მამაკაცს ხელოვნური სუნთქვა ჩაუტარა, მეორემ კი მისივე ტელეფონიდან სასწრაფო დახმარების ნომერი აკრიფა.
დახმარება სწრაფად მოვიდა და ოფიცერი კლინიკაში გადაიყვანეს. ექიმების თქმით, დროული დახმარების გარეშე ოფიცერი ცოცხალი ვერ გადარჩებოდა.
„ეს იმაზე მეტყველებს, რომ ჩემი ოფიცრები სამუშაოს კარგად ასრულებენ. ისინი პატიმრებს მეორეხარისხოვან კი არა, ჩვეულებრივ ადამიანებად აღიქვამენ, რომლებსაც ცხოვრებაში არ გაუმართლათ“, - განაცხადა ციხის დირექტორმა ჯონი მოტსმა.
„იმის მიუხედავად, რომ იარაღი და მანქანა მათ ხელში იყო, ჩემი ბიჭებიდან გაქცევა არავის უფიქრია, არადა მსოფლიოში უამრავი შემთხვევაა, როცა პატიმრები ბადრაგებს უმოწყალოდ ხოცავენ და ციხიდან გარბიან. ცოცხალი ჩემი პატიმრების წყალობით გადავრჩი, რისთვისაც მათი უზომოდ მადლობელი ვარ“, - აღნიშნა სიკვდილს გადარჩენილმა ოფიცერმა.
გადარჩენილი ბადრაგის ოჯახმა პატიმრებს, მადლობის ნიშნად, გემრიელი სადილი მოუმზადა.