2009 წელს 47 წლის კეროლ ბრაიანმა კოსმეტოლოგს ასაკობრივი ნაოჭების მოცილების თხოვნით მიმართა. სპეციალისტმა ქალს შუბლზე და ლოყებზე ფილერის ინექციის გაკეთება ურჩია (პრეპარატი, რომელიც ნაოჭებს ასწორებს), თუმცა ინექციის შემდეგ ქალს სახე შეუშუპდა და სისხლჩაქცევები გაუჩნდა. კოსმეტოლოგმა აუხსნა, რომ ეს წამლის უკუჩვენებაა და საშიში არაფერია. სამი დღის შემდეგ კეროლი კოსმეტოლოგთან მეორე ინექციის გასაკეთებლად მივიდა, რამაც მისი მდგომარეობა კიდევ უფრო დაამძიმა. როდესაც ქალის სახე უფორმო მასად იქცა, გაირკვა, რომ კოსმეტოლოგმა შეცდომით შპრიცში ერთმანეთთან არათავსებადი პრეპარატები შეურია.
„30 წლის შემდეგ ბოტოქსის ინექციის კეთება დავიწყე და შედეგით ძალიან კმაყოფილი ვიყავი. ჩემი სახე გაცილებით ახალგაზრდული გახდა. ფილერის ინექციის შემდეგ კი თითქოს სხვისი თავი მომაბეს. შუბლი ისე დამიმძიმდა, რომ თავის დაჭერა მიჭირდა და თითქმის ვერაფერს ვხედავდი“, - იხსენებს კეროლი.
ფილერის პროცედურებმა ქალს მხედველობის ნერვი დაუზიანა და კეროლმა მარჯვენა თვალში მხედველობა სამუდამოდ დაკარგა.
კეროლი სამი წელი სახლიდან არ გამოსულა. ის ოჯახის წევრებსაც კი ემალებოდა, სანამ მისმა შვილმა დედის რეაბილიტაციაზე ფიქრი არ დაიწყო. 7 წლისა და მრავალრიცხოვანი ქირურგიული ოპერაციის შემდეგ ქალმა ნორმალური გარეგნობის დაბრუნება შეძლო, თუმცა ძველებურად ლამაზი აღარაა.
ამჟამად კეროლი ხელმძღვანელობს უხარისხო კოსმეტიკური პროცედურების წინააღმდეგ ბრძოლის საზოგადოებრივ მოძრაობას. კეროლი ყველა ქალს მოუწოდებს, რომ მისი შეცდომა არ გაიმეორონ და ყველაზე უვნებელ პროცედურებსაც კი უდიდესი სიფრთხილით მოეკიდონ.