2019 წლის საახალწლო მენიუს ეს ვარიანტი სრულიად განსხვავებული ინგრედიენტების საოცარი შერწყმაა - ქათმის ფილე, კივი და ვაშლი.
ინგრედიენტები:
ქათმის ფილე - 2 ცალი
ქათმის კვერცხი - 5 ცალი
კივი - 2 ცალი
ვაშლი - 1 ცალი
სტაფილო - 1 ცალი (ან სტაფილო კორეულად 150 გრამი)
მაგარი ყველი - 150 გრამი
ნიორი - 1-2 კბილი
მაიონეზი - გემოვნებით
ლიმონის წვენი - 1 სუფრის კოვზი
მოსართავად დაგჭირდებათ:
კივი - 4-5 ცალი
მომზადების წესი:
ქათმის ფილე კარგად გარეცხეთ, ჩადეთ ცივ წყალში და ხარშეთ დაახლოებით 30 წუთის განმავლობაში. გააცივეთ. დაჭერით კუბიკებად ან ხელით დაციცქნეთ. მოაყარეთ ცოტაოდენი მარილი, დააჭყლიტეთ ნიორი, დაამატეთ მაიონეზი (დაახლოებით 2 ს/კ) და კარგად გადაურიეთ.
სტაფილოც კარგად გარეცხეთ, ცივი წყალი დაასხით და ისიც დაახლოებით 30 წუთი ხარშეთ. გააცივეთ. გაასუფთავეთ. და გახეხეთ მსხვილ სახეხზე.
კვერცხიც ცივ წყალში ჩადეთ და მაგრად მოხარშეთ, წყლის ადუღების შემდეგ ხარშეთ 10 წუთი. გააცივეთ, გაფცქვენით და გახეხეთ მსხვილ სახეხზე.
მაგარი ყველი გახეხეთ წვრილ სახეხზე.
კივი გაფცქვენით. 2 კივი კუბიკებად დაჭერით. ვაშლი გარეცხეთ, გათალეთ, თესლი მოაშორეთ. დაჭერით კუბიკებად. ცოტაოდენი ლიმონის წვენი მოასხურეთ, რომ არ გაშავდეს.
ლანგრის ცენტრში დადგით ჭიქა და მის გარშემო, რგოლის ფორმით, პირველ ფენად შემოაწყვეთ მაიონეზითა და ნივრით უკვე შეზავებული ქათმის ფილე. ზემოდან დაალაგეთ დაჭრილი კივი. შემდეგი ფენა იქნება გახეხილი კვერცხი, მოაყარეთ მარილი და მოასხით მაიონეზი. შემდეგი ფენა - სტაფილო და მაიონეზი, ზემოდან ვაშლი და ბოლო ფენა - ყველი. მასაც მაიონეზი გადაუსვით და ლამაზი ფორმა მიეცით. კივი დაჭერით თხელ ნაჭრებად და გარშემო შემოაწყვეთ, ამოიღეთ ჭიქა და სალათა მთლიანად დაფარეთ კივით. სალათა „მალაქიტის ბრასლეტი“ მზადაა. შედგით მაცივარში 2-3 საათით სუფრასთან მიტანამდე.
გემრიელად მიირთვით!