პილეა (ლათ. Pilea) - ჭინჭრისებრთა ოჯახის წარმომადგენელი ერთ ან მრავალწლოვანი ბალახოვანი (ზოგჯერ ბუჩქოვანიც) მცენარეა, რომელიც 400-მდე სახეობას აერთიანებს და ავსტრალიის გარდა, დედამიწის ყველა ტროპიკულ რაიონშია გავრცელებული.
ამჯერად, პილეას ერთ-ერთი სახეობის - პეპერომიასებრი პილეას (ლათ. Pilea peperomioides) შესახებ ვისაუბრებთ, რომელსაც ბარაქის სიმბოლოდ მიიჩნევენ, ამიტომ „იაპონურ დოლარსა“ და „ჩინურ ფულის ხესაც“ ეძახიან.
პეპერომიასებრი პილეა მცირე ზომის - 30 სმ-მდე სიმაღლის მცენარეა, რომელიც ოვალური, თითქმის მრგვალი და ხორცოვანი ფოთლებითაა დაფარული. ფოთლების შეფერილობა მკვეთრი მწვანეა.
პეპერომიასებრი პილეა იშვიათად ყვავილობს და თუ იყვავილა, ისიც მხოლოდ წვრილ-წვრილი, მოყვითალო-მომწვანო, თითქმის შეუმჩნეველი ყვავილებით.
განათება
პეპერომიასებრი პილეა უპირატესობას მკვეთრ განათებას, ან ნახევრად ჩრდილს ანიჭებს, თუმცა მზის პირდაპირი სხივები არ უყვარს. ამიტომ თუ მას მზიან ფანჯარასთან მოათავსებთ, შუადღის მწველი მზე აუცილებლად ფარდით მოუჩრდილეთ.
ტემპერატურა
ზაფხულში ოთახის ტემპერატურა 20-220C უნდა იყოს,
ზამთარში კი - 16-180C-ს არ უნდა აჭარბებდეს.
ზაფხულის თბილ დღეებში შეგიძლიათ, მცენარე სუფთა ჰაერზეც გაიტანოთ, მხოლოდ მზის პირდაპირ სხივებსა და ორპირ ქარს მოარიდეთ.
ჰაერის ტენიანობა
პეპერომიასებრი პილეა წარმოშობით ტენიანი ტროპიკებიდანაა, ამიტომ ჰაერის მაღალ ტენიანობას საჭიროებს. ტენიანობის ხელოვნურად ასამაღლებლად, კარგი იქნება, თუ ზამთარში - კვირაში 1-ხელ, ხოლო ზაფხულში - კვირაში 3-ჯერ ფოთლებზე ოთახის ტემპერატურის წყალს შეასხურებთ.
ეცადეთ, წყლის შესხურების დროს მცენარეს მზის პირდაპირი სხივები არ ხვდებოდეს, რადგან ეს ფოთლების დაზიანებას (დაწვას) გამოიწვევს.
მორწყვა
პეპერომიასებრი პილეა ტენის მოყვარული მცენარეა, ამიტომ ზაფხულში ხშირად - 7-9 დღეში 3-ჯერ, ზამთარში კი შედარებით ზომიერად - 10 დღეში 1-ხელ მორწყეთ.
განოყიერება
პეპერომიასებრი პილეა განოყიერებას მხოლოდ გაზაფხულსა და ზაფხულში (მარტიდან აგვისტოს ბოლომდე) საჭიროებს.
ამისთვის საკმარისია 15-20 დღეში 1-ხელ მოსარწყავ წყალში მცირე რაოდენობით რომელიმე კომპლექსური სასუქი ჩაამატოთ.
ნიადაგი და გადარგვა
მცენარე ყოველწლიურად, გაზაფხულზე ან ზაფხულში გადარგეთ.
ნიადაგი შემდეგი შემადგენლობის მოამზადეთ: 3 წილ კორდის მიწას თითო წილი ტორფი, გადამწვარი ნაკელი და ქვიშა გადაურიეთ.
გამრავლება
პეპერომიასებრ პილეას ძირეული ამონაყარით, ან მწვანე კალმის დაფესვიანებით ამრავლებენ.
ძირეული ამონაყარი მცენარის გადარგვისას გააცალკევეთ.
კალმით გამრავლებისას კი მოაჭერით მცენარეს მწვანე ტოტი და ფხვიერ სუბსტრატში - ქვიშაში, ტორფში ან პერლიტში დააფესვიანეთ.