- „ნიჭიერში“ გამოსვლა ჩემმა ქორეოგრაფებმა მირჩიეს და ამისთვის მათ დიდ მადლობას ვუხდი. სიმართლე გითხრათ, ასეთ გამოხმაურებას არც ველოდი, რადგან ტანმოვარჯიშე ვარ და პირველად ვიცეკვე.
- თქვენ მიერ შესრულებულ ნომერზე რას გვეტყვით?
- ტანვარჯიშის ელემენტებით შესრულებულმა ცეკვამ დიდი მოწონება დაიმსახურა, თუმცა შენიშვნები მაინც მივიღე. რადგან ტანმოვარჯიშე ვარ, ჟიურის წევრები ჩემგან მეტ ცეკვას ელოდნენ. საბედნიეროდ, ნახევარფინალში ვარ!
- დიდი კონკურენციის ფონზე რა იმედები გაქვთ?
- კონკურენცია მართლაც საკმაოდ დიდია, თუმცა ფინალისთვის ძალიან ბევრს ვვარჯიშობ. ყოველდღე მაქვს რეპეტიციები და ფინალისთვის ბოლომდე ვიბრძოლებ!
- რამდენი ხანია, რაც ტანმოვარჯიშე ხართ?
- ძალიან პატარა ვიყავი, როცა ტანვარჯიშით დავინტერესდი, თუმცა მშობლებმა ამ სპორტზე 7 წლის ასაკში მიმიყვანეს. ჩემი საქმე ძალიან მიყვარს!
- რა მიღწევები გაქვთ?
- თბილისის პირველობაზე მესამე ადგილი მაქვს აღებული. ასევე, გერმანიაში პასტორელის და ისრაელში ვენერა ზარიპოვას თასების ბრინჯაოს პრიზიორი ვარ. თვის ბოლოს ისრაელში წასვლას ისევ ვგეგმავთ და დიდი იმედი მაქვს, კიდევ ერთი საპრიზო ადგილით დავბრუნდები.
- საყვარელი სპორტი სწავლაში ხელს ხომ არ გიშლით?
- მეცხრე კლასის მოსწავლე ვარ. სკოლის გაცდენა ხშირად მიწევს, რადგან დილიდან საღამომდე დარბაზში ვარ. ამის გამო გასულ წელს ექსტერნად მომიწია გამოცდების ჩაბარება. მასწავლებლები ძალიან მიწყობენ ხელს.
- სხვა რა გატაცებები გაქვთ?
- სხვა ვერაფერზე ვფიქრობ, რადგან ტანვარჯიშია ჩემი ცხოვრება!