- თავიდან არ მქონდა გადაწყვეტილი „ნიჭიერში“ მონაწილეობა. ყველა კონკურსს ნერვიულობა ახლავს და ამას ვერიდებოდი. როდესაც კასტინგები გამოცხადდა, მშობლებმა მირჩიეს, გამოვსულიყავი. რაც შეეხება სიმღერას, ბავშვობიდან ვმღერი, რაღაც პერიოდი ვოკალის პედაგოგთანაც დავდიოდი, მაგრამ ახალა ვეღარ ვახერხებ.
- როგორც ვიცი, სკოლის მოსწავლე ხარ.
- დიახ. მე-9 კლაში ვარ და ათიანებზე ვსწავლობ. რატომღაც ჰგონიათ, რომ რადგან ვმღერი, კარგად არ უნდა ვსწავლობდე, მაგრამ ასე არ არის. ჩემი ყოველდღიური ცხოვრება ჩვეულებრივია: დილას სკოლაში ვარ, გაკვეთილების შემდეგ მუსიკაზე მივდივარ, თავისუფალ დროს ინტერნეტში „დავძვრები“ და მეგობრებთან ერთად ვსეირნობ. ასევე დავდივარ ჩოგბურთზე, ძალიან მიყვარს ეს სპორტი.
- მომავალი პროფესია უკვე არჩეული გაქვს?
- ჯერ არ მაქვს გადაწყვეტილი. ან სამედიცინო სფეროს გავყვები, ან მსახიობობას ავირჩევ, ვნახოთ.
- ელოდებოდი ასეთ წარმატებას?
- იმედი მქონდა, რომ გადავიდოდი, მაგრამ ძალიან ვნერვიულობდი. როდესაც სცენაზე გამოვედი, ნერვიულობამ გადამიარა. ყველაზე მეტად ნიკა გვარამიას შეფასების მეშინოდა. ძალიან ვღელავდი, რას მეტყოდა, რადგან ზოგადად ცოტა მკაცრია კონკურსანტების მიმართ. ისე, მგონი, ჩემი გამოსვლა მოეწონა.
- მოგვიყევი შენს ოჯახზე...
- მყავს დედა, მამა და ძმა. მთელი ჩემი ოჯახი მღერის, პაპაც და ბებოც კი. ალბათ გენეტიკურად გამომყვა ეს ნიჭი. ბებო ახლა ესპანეთშია და იქიდან ძალიან მგულშემატკივრობს.
- შემდეგ ტურში რას იმღერებ?
- არ ვიცი, შეიძლება თუ არა, მაგრამ მინდა, ჩემს ძმასთან ერთად დუეტი შევასრულო. თუ ეს არ მოხერხდება, მაშინ ისევ სოლოს ვიმღერებ.
- როგორია შენი მოლოდინი?
- დიდი კონკურენციაა, ამიტომ წინასწარ ვერაფერს ვიტყვი. ყველაფერი ხალხის აქტიურობაზეა დამოკიდებული, თუმცა პოპულარობა უკვე ვიგრძენი. ეს ძალიან სასიამოვნოა, მაგრამ რაღაც უარყოფითიც სდევს. მაგალითად, პოპულარულ ადამიანებზე ხანდახან ისეთ რამეს ამბობენ, რაც სიმართლე არ არის. მიაჩნიათ, რომ თუ პოპულარული გახდი, შეიძლება, თავში აგივარდეს, მაგრამ მე ასე არ ვარ.