შეცდომა №1 - ჯინსის წაღმა მხრიდან გარეცხვა
გარეცხვამდე ჯინსი უნდა ამოაბრუნოთ. როგორი ფაქიზი რეჟიმიც არ უნდა შეარჩიოთ, სარეცხი მანქანა ჯინსის სწრაფ ცვეთას იწვევს. ამიტომ სარეცხ მანქანაში მოთავსებამდე, ჯინსის შარვალი ან ქვედაბოლო უნდა ამოაბრუნოთ და უკუღმა მხრიდან გარეცხოთ. არც ელვა შესაკრავებისა და ღილების შეკვრა დაგავიწყდეთ - მათ შეიძლება შედარებით თხელი ქსოვილი დააზიანონ.
შეცდომა №2 - ერთ ჯერზე, რამდენიმე ჯინსის რეცხვა
ყველა ცდილობს, რომ დრო და რესურსი დაზოგოს, მაგრამ ერთად რაც უფრო მეტ ჯინსს გარეცხავთ, მით მეტია შანსი, რომ ქსოვილი პირვანდელ სახეს დაკარგავს. ასე რომ, უმჯობესია, ჯინსები ცალ-ცალკე გარეცხოთ.
შეცდომა №3 - რეცხვის არასწორი რეჟიმი
გახსოვდეთ, რაც უფრო ფაქიზი რეცხვის რეჟიმს შეურჩევთ, მით უფრო კარგად გამოიყურება ქსოვილი. ჯინსის ხელით რეცხვა იდეალური შემთხვევაა, თუმცა ამის დრო და რესურსი ყველას არ აქვს, ამიტომ მანქანით რეცხვის დროს, შეარჩიეთ ყველაზე ფაქიზი რეცხვის რეჟიმი (თითქმის დელიკატური) და დაბალი ტემპერატურა. ასეთ შემთხვევაში თქვენი ჯინსი დიდხანს არ დაკარგავს პირვანდელ სახეს.
შეცდომა №4 - სარეცხი ფხვნილის შერჩევა
ბევრს ჰგონია, რომ ფერადი ქსოვილისთვის განკუთვნილი სარეცხი ფხვნილი კომერციული ხრიკია, მაგრამ სინამდვილეში ასე არ გახლავთ. ამ ფხვნილის მთავარი ამოცანაა გაანეიტრალოს წყალში შემავალი ქლორი და ქსოვილს ფერი შეუნარჩუნოს. თუ გსურთ, რომ ჯინსის შარვალმა ან კაბამ ფერი არ დაკარგოს და გახუნდეს, მხოლოდ ფერადი ქსოვილისთვის განკუთვნილი სარეცხი ფხვნილით უნდა რეცხოთ.
შეცდომა №5 - წურვისა და შრობის რეჟიმი
გახსოვდეთ, რომ ავტომატური შრობისა და ძლიერი წურვის რეჟიმები ჯინსის ქსოვილის ცვეთასა და მოთელვას იწვევს. ამის თავიდან ასაცილებლად, სარეცხი მანქანიდან ჯინსი ნახევრად სველი უნდა გამოიღოთ და ტანსაცმლის საკიდზე გააშროთ.
თუ ჩვენს რჩევებს გაითვალისწინებთ, საყვარელი ჯინსის ტანსაცმელი დიდხანს მოგემსახურებათ.