მსახიობი კატრინ დენევი და მისი თანამოაზრეები წერილში აცხადებენ, რომ მამაკაცების წინააღმდეგ 2017 წლის ოქტომბრიდან აგორებული კამპანია #MeToo პურიტანიზმის ნიშნებს შეიცავს.
როგორც წერილშია აღნიშნულია, ამერიკელი პროდიუსერის ჰარვი ვაინშტაინის ირგვლივ ატეხილი სკანდალი საფრთხეს უქმნის „სექსუალურ თავისუფლებას“. ამ საზოგადოებრივი მოძრაობის ქარიშხალმა იმ კაცებსაც გადაუარა, ვინც, უბრალოდ, ქალის ამბორი ან მუხლის თავზე შეხება სცადეს და მათი მცდელობა მძიმე დანაშაულად შეფასდა.
„გაუპატიურება - ეს მძიმე დანაშაულია. მაგრამ ფლირტი, თუნდაც დაჟინებული, არ წარმოადგენს უფლებების დარღვევას, ისევე როგორც გალანტურობას არ შეიძლება ვუწოდოთ აგრესიული მექალთანეობა. ჰარვი ვაინშტაინის საქმის კონტექსტში სამართლიანი ყურადღება გამახვილდა, ზოგადად, სექსუალური შევიწროების პრობლემაზე და ეს აუცილებელი ნაბიჯი იყო. თუმცა ამ მიმართულებით სიტყვის თავისუფლებამ დღეს საპირისპირო შედეგები მოიტანა - გვაიძულებს, ვილაპარაკოთ ის, რაც „საჭიროა“ და თუ სხვა აზრი გვაქვს, უნდა გავჩუმდეთ. ვინც ამ მოთხოვნებს არ ეთანხმება, მას მოღალატედ ან დამნაშავის თანამზრახველად აფასებენ“, - ნათქვამია Le Mond-ში გამოქვეყნებულ წერილში.
ცნობისთვის - 2017 წლის ოქტომბერში რამდენიმე ათეულმა მსახიობმა ქალმა აღიარა, რომ ჰოლივუდელი პროდიუსერი ჰარვი ვაინშტაინი მათ სექსუალური ხასიათის ქმედებებისკენ უბიძგებდა. მათი აღიარების შემდეგ ძალადობისა და გაუპატიურების ფაქტებზე კიდევ ბევრი ქალი ალაპარაკდა.
.
