АВВА-ს წევრები - აგნეტა ფელტსკუგი, ბენი ანდერსონი, ბიორნ ულვეუსი და ანი-ფრიდ ლიუნგსტადი - ბოლო 35 წლის მანძილზე პირველად შეიკრიბნენ ხმის ჩამწერ სტუდიაში, რათა ორი ახალი სიმღერა ჩაეწერათ.
ამის შესახებ მუსიკოსებმა თავიანთ Instagram-ზე განაცხადეს.
ერთ-ერთი სიმღერა I Still Have Faith In You („მე კვლავ მჯერა შენი“) სატელევიზიო შოუს ნაწილი გახდება და დეკემბერში გავა ეთერში.
ეს შოუ ჯგუფს ეძღვნება, სადაც სიმღერას ე.წ. „აბბატარები“ - მუსიკოსების ციფრული ასლები შეასრულებენ.
მეორე სიმღერის სახელს ჯგუფი ჯერ არ ამჟღავნებს.
„ოთხივემ გადავწყვიტეთ, რომ 35 წლის შემდეგ კარგი იქნებოდა კვლავ ერთად შეკრება. ასეც მოვიქეცით. როგორც ჩანს, დრო შეჩერდა, ჩვენ კი მხოლოდ არდადეგებზე ვიყავით წასული“, - ნათქვამია ჯგუფის განცხადებაში.
როგორც მუსიკოსები ამბობენ, ტელეპროგრამის პროდიუსერები არიან ტელეარხები NBC და BBC.
„შესაძლოა, ჩვენ დავბერდით, მაგრამ სიმღერები ახალია და ეს ძალიან კარგია“, - ამბობენ მუსიკოსები.