ცივ ამინდებში სახის კანისთვის აუცილებელია სასწრაფო დახმარების აღმოჩენა, რაც გულისხმობს სპეციალურ, სამკურნალო, სახლში დამზადებული ნიღბებით სარგებლობას, რომლებიც სწრაფად დაუბრუნებს თქვენს კანს ჯანსაღ იერსა და სილამაზეს. გაგაცნობთ ამგვარი ნიღბის ოთხ ეფექტურ რეცეპტს.
თაფლისა და კარტოფილის ნიღაბი
მოხარშეთ ერთი ცალი კარტოფილი და ჩასრისეთ. პიურეს დაამატეთ ერთი სუფრის კოვზი თაფლი, საგულდაგულოდ გადაურიეთ ერთმანეთში. მიღებულ მასას დაამატეთ რამდენიმე წვეთი ლიმონის წვენი. ცალკე ათქვიფეთ კვერცხის ცილა და თაფლიან კარტოფილის მასას დაამატეთ. სანამ ნიღაბს სახეზე შეიზელთ, ოთახის ტემპერატურაზე შეათბეთ და სახეზე 10 წუთი გაიჩერეთ. შემდეგ კი თბილი წყლით ჩამოიბანეთ, საპნის გარეშე.
ხილის ნიღაბი
ამ ტიპის ნიღაბი სახის კანის აღსადგენად უდავოა. ხილში დიდი რაოდენობით შემავალი სასარგებლო ნივთიერებები სახის კანისთვის უებარი წამალია. ამიტომ, დაზიანებულ და აქერცლილ კანს ხილის ნიღბით მარტივად დაუბრუნებთ მბზინვარებასა და სიკაშკაშეს.
ხილის ნიღბის მოსამზადებლად 3-4 სახეობის ნებისმიერი ხილი დაგჭირდებათ, ცისტურისა და კივის გარდა (ციტრუსი შეიცავს დიდი რაოდენობით C ვიტამინს, რაც გაღიზიანებულ კანს კიდევ უფრო გააღიზიანებს). მოამზადეთ ხილის პიურე და დაამატეთ კვერცხის ცილა (ათქვეფის გარეშე). კარგად გადაურიეთ ერთმანეთში და მიღებული მასა სახეზე შეიზილეთ. ხილის ნიღბით სარგებლობამდე სასურველია, სახე დაიორთქლოთ. ნიღაბი სახეზე გაიჩერეთ, დაახლოებით, 30 წუთით და ბოლოს თბილის წყლით ჩამოიბანეთ, საპნის გარეშე.
თიხის ნიღაბი
პირველ რიგში, დააყენეთ შავი ჩაი. სამი სუფრის კოვზ ცისფერ თიხას დაამატეთ სამი სუფრის კოვზი წყალი, ერთი ჩაის კოვზი კონიაკი და კარგად გადაურიეთ ერთმანეთში. მიღებულ მასას დაამატეთ ორი სუფრის კოვზი შავი ჩაი, გადაურიეთ საგულდაგულოდ და შეიზილეთ სახეზე. გაიჩერეთ, დაახლოებით, 10 წუთი (ისე, რომ სახეზე ძალიან არ შეგახმეთ) და ჩამოიბანეთ გრილი წყლით.
არაჟნისა და ზეთის ნიღაბი
ეს საკმაოდ ცხიმიანი ნიღაბია და ამიტომაც არის ძალიან ეფექტიანი დაზიანებული, გამომშრალი და აქერცლილი სახის კანისთვის. 4-5 სუფრის კოვზი არაჟანი მიიყვანეთ ოთახის ტემპერატურამდე (შეეცადეთ, არაჟანი იყოს მაქსიმალური ცხიმიანობის). დაამატეთ ორი ჩაის კოვზი ზეითუნის ან მზესუმზირის ზეთი. კარგად გადაურიეთ და შეიზილეთ სახეზე 20-30 წუთით. შემდეგ კი თბილი წყლით ჩამოიბანეთ, სახის დასაბანი გელის ან საპნის დახმარებით.