„ვერაფრით ვიჯერებდი და ცრემლებად ვიღვრებოდი. შეზღუდული შესაძლებლობების მქონე პირების კონკურსიდან სილამაზის უდიდეს ფორუმზე მოვხვდი. ეს დაუჯერებელია... თითქმის სიგიჟეა“, - განაცხადა ჟურნალისტებთან მიქაელა ჰოლმგრენმა მას შემდეგ, რაც „მის მინესოტას“ კონკურსზე Spirit of Miss USA პრიზი გადაეცა.
მიქაელა ადრეც მონაწილეობდა სილამაზის კონკურსებში, თუმცა ეს მხოლოდ შშმპ კონკურსი გახლდათ.
2017 წლის აპრილში გოგონამ ერთ-ერთ ასეთ კონკურსზე - Miss Minnesota Amazing გაიმარჯვა.
კონკურსის დასრულებიდან რამდენიმე დღეში მიქაელამ სილამაზის კონკურსიდან „მის მინესოტა“ წერილი მიიღო, რომელშიც კონკურსის ორგანიზატორები მათთან განაცხადის შეტანას სთავაზობდნენ.
„ნებისმიერი, ვინც მას გაიცნობს, მიხვდება, რომ მიქაელა ის ადამიანია, ვისაც შეუძლია შშმ პირთა ინტერესები წარმოადგინოს და ის გოგონაა, ვინც იმსახურებს, რომ სილამაზის კონკურსში გაიმარჯვოს“, - განაცხადა სილამაზის კონკურსის აღმასრულებელმა დირექტორმა დენიზ უოლესმა.
მიქაელამ კონკურსის ჟიური თავისი ბუნებრივი მონაცემებით და მშვენივრად შესრულებული ცეკვებით მოხიბლა. ის აქტიური ცხოვრებით ცხოვრობს, ექვსი წლიდან ცეკვის სტუდიაში დადის და უკვე შესანიშნავ შედეგებს მიაღწია.
„ცეკვა ჩემთვის მშვენიერი გამოსავალია და შესაძლებლობა, რომ ადამიანებს ვაჩვენო, რა შემიძლია“, - ამბობს გოგონა.
ბუნებრივია, ჰოლმგრენის სილამაზის კონკურსში მონაწილეობა სახელმწიფოს დამსახურებაც გახლავთ, რომელიც შშმ პირთა საზოგადოებაში ინტეგრაციას ცდილობს.
კონკურსზე მიქაელას საგულშემატკივროდ უამრავი დედა დაუნის სინდრომის მქონე შვილთან ერთად მივიდა. ერთ-ერთმა ასეთმა დედამ, ლანა ბიტონმა ჟურნალისტებთან განაცხადა: „სრულიად შოკირებული დავრჩი. ვგრძნობ, რომ უდიდესი ენერგიით, იმედითა და მომავლის რწმენით ავივსე“.
აღსანიშნავია, რომ სილამაზის კონკურსის „მის მინესოტა“ ორგანიზატორები ცდილობენ, კონკურსანტების შემადგენლობა უფრო მრავალფეროვანი გახადონ. 2016 წელს კონკურსში მონაწილეობა მიიღო 19 წლის სომალიური წარმოშობის ამერიკელმა გოგონამ, ხალიმა ადენმა, რომელმაც პოდიუმზე ჰიჯაბით გაიარა.