- მაგდა, როგორი მენტორია ლელა?
- ძალიან კარგი, მაქსიმალურად ცდილობს, ჩემი ჟანრიდან არ ამოვვარდე. „გუფი ლენდის“ პერიოდში სხვა რაღაცების კეთება მიწევდა და ახლა კი ლელას დამსახურებით ვმღერი იმას, რაც ჩემთან ძალიან ახლოა.
- რატომ გადაწყვიტეთ „X ფაქტორში“ მონაწილეობა, მაშინ როცა საზოგადოებამ წლების წინათ ერთ-ერთი მუსიკალური პროექტიდან კარგად გაგიცნოთ?
- ყველა ამას მეუბნება, მაგრამ იყო პერიოდი, როცა ვეღარავინ მცნობდა და მაგდა ვასაძე აღარავის ახსოვდა. ამიტომ გადავწყვიტე, მოვსულიყავი „X ფაქტორში“ და ხალხისთვის მეთქვა, რომ არსად წავსულვარ. პროექტში იმისთვის მოვედი, რომ საზოგადოებას ბევრი კარგი სიმღერა მოვასმენინო. პროექტის დასრულების შემდეგ კი ახალ რეპერტუარზე მუშაობას ვგეგმავ.
- ვინ არის ამ ეტაპზე თქვენი ყველაზე დიდი გულშემატკივარი?
- ჩემი შვილი, 11 წლის ლუკა ბოლქვაძე. „X ფაქტორში“ ჩემი მონაწილეობა ლუკას დიდი სურვილიც იყო. გარდა ამისა, მყავს მეუღლე, მუსიკოსი, მხატვარი და, პირველ რიგში, ძალიან კარგი ადამიანი გიორგი პაპკიაური.
- როგორც აღნიშნეთ, ერთი პერიოდი ხალხი ვეღარ გცნობდათ. კარიერულ წინსვლაში დაოჯახებამ ხომ არ შეგიშალათ ხელი?
- დაოჯახებას კარიერულ წინსვლაში ხელი არ შეუშლია. პირიქით, გიორგი ყველანაირად ხელს მიწყობს, რომ კიდევ უფრო მეტ წარმატებას მივაღწიო.
