სტეფანეს გუნდის წევრმა, ჯგუფმა Mix2ra-მ მაყურებელს განსაკუთრებული ნომერი წარმოუდგინა, სცენაზე ნამდვილი ცეცხლი დაანთო და ჟიურის წევრებისგან შესაბამისი შეფასებაც მიიღო.
გიორგი გაბუნიას ჯგუფის წევრების, თამარ ედილაშვილისა და გრიგოლ ყიფშიძის გამოსვლასაც ანშლაგი მოჰყვა, თუმცა ყველასთვის მოულოდნელად ორივე მათგანი აუტსაიდერებში მოხვდა, რის შემდეგაც გაბუნიამ პირდაპირ ეთერში ცრემლები ვერ შეიკავა და გადაწყვეტილებაც ჟიურის დანარჩენ წევრებს მიანდო. საბოლოოდ პროექტი თამარ ედილაშვილმა დატოვა.
გიორგი გაბუნია: თამარი და გრიგოლი ერთად აუტსაიდერებში - სრულიად არაბუნებრივი რამ მოხდა, თუმცა ეს დღე მაინც კოშმარივით მქონდა წარმოდგენილი. რაღაც მომენტში ვცდილობდი, ამ საშინელებას შევგუებოდი, მაგრამ ფინალამდე ისე მოვედი, ვერ შევეგუე. თამარი და გრიგოლი ყველგან ერთად იყვნენ და არ მინდოდა, აუტსაიდერებშიც ერთად მდგარიყვნენ. ყველაზე მეტად რისიც მეშინოდა, ის მოხდა.
- გადაწყვეტილებაც კი ვერ მიიღეთ...
- ეს ჩემთვის შეუძლებელი აღმოჩნდა. იმ მშობელივით ვგრძნობდი თავს, რომელსაც აიძულებდნენ, რომ ორიდან ერთი შვილი ამოერჩია. გადაწყვეტილება ჩემმა კოლეგებმა მიიღეს და ამისთვის დიდ მადლობას ვეუბნები და ბოდიშს ვუხდი. ათჯერ რომ განმეორდეს სიტუაცია, ათჯერვე ვერ მივიღებ გადაწყვეტილებას.
- ფინალურ ეტაპზე გრიგოლის შესაძლებლობებს როგორ შეაფასებთ?
- რა თქმა უნდა, გრიგოლზე დიდ იმედს ვამყარებ. დამთავრდა ის ეტაპი, როცა ჩვენ რომელიმე კონკურსანტის პროექტში დატოვება შეგვეძლო. ახლა უკვე ყველაფერი მაყურებელზეა დამოკიდებული. ყველა ხედავს, გრიგოლს რამდენი გულშემატკივარი ჰყავს და იმედი მაქვს, მათთვის გრიგოლის დღევანდელი აუტსაიდერობა ნიშანი იქნება იმისა, რომ ამ ნიჭიერ ბიჭს მხარდაჭერა სჭირდება. ის ნამდვილად იმსახურებს გამარჯვებას.