ჟიურის წინაშე წარდგა თუ არა, გიორგი გაბუნიამ მაშინვე აღნიშნა - „პირველი ეფექტი უკვე არის!“. მონაწილემ გამოსვლა შეყვარებულს მიუძღვნა.
სიმღერის „stay with me“-ს შესრულების შემდეგ ვერც ნიკა გვარამიამ შეიკავა ემოცია, სცენაზე ავიდა და კონკურსანტს ჩაეხუტა.
„შენს შეყვარებულს არაფერი სცოდნია. შენს ადგილას სხვა სიმღერას ვუმღერებდი“, - მიმართა გაბუნიამ ცირას და მხოლოდ ამის შემდეგ გაირკვა, რომ კონკურსანტი გარდაცვლილ შეყვარებულს უმღეროდა.
„19 წლის ასაკში უკვე შენი ბიოგრაფია გაქვს“, - ასე შეაფასა ნიკა გვარამიამ მონაწილე. „ეს იყო ძლიერი ქალის დრამა, სადაც ყველანაირი ხასიათი იყო ნაჩვენები“, - აღნიშნა ნინა სუბლატმა.
„შენ დღეს ორი ადამიანის სათქმელი თქვი“, - ამ სიტყვებით შემოიფარგლა ჟიურის ყველაზე კრიტიკული წევრი, გიორგი გაბუნია.
ემოციური ნომრის შემდეგ Funtime-მა ცირას კულისებში რამდენიმე შეკითხვა დაუსვა.
- ეს თქვენთვის პირველი მუსიკალური კონკურსია?
- კი, ასეა. ამ დრომდე კონკურსებში მონაწილეობა არ მიცდია, რადგან საკუთარ შესაძლებლობებში დარწმუნებული არ ვიყავი, მხოლოდ მეგობრების წრეში თუ ვიმღერებდი. ახლა კი ოჯახის დაძალებით გადავწყვიტე, კონკურსშიც მიმეღო მონაწილეობა. „X ფაქტორი“, ალბათ, დამეხმარება იმაში, რომ ჩემი ცხოვრება სხვა ეტაპზე გადავიყვანო.
- საყვარელი ადამიანის გარეშე ცხოვრება როგორ გრძელდება?
- ჩვენ ერთი წელი ვიყავით ერთად... ის ადამიანი ორი თვის წინ გარდაიცვალა. ძალიან მიჭირს მის გარეშე. განსაკუთრებით კი დილით, როცა თენდება და მინდა, რომ დავურეკო, მოვიკითხო და დღე ერთად დავგეგმოთ. რთულია იმის გაცნობიერება, რომ ის ჩემ გვერდით აღარაა... მაგრამ ცხოვრება გრძელდება და ზუსტად ვიცი, რომ მას ჩემი ცუდად ყოფნა არ გაუხარდებოდა. გრძნობებში ორივე დარწმუნებულები ვიყავით. ძალიან მგულშემატკივრობდა და ყოველთვის უნდოდა, რომ სიმღერაში წარმატებისთვის მიმეღწია. „X ფაქტორში“ გამოსასვლელად ჩემთვის ერთ-ერთი უმთავრესი მიზეზი და სტიმული სწორედ ის ადამიანია. ბედნიერი ვარ, რომ მისი თხოვნა შევასრულე. ჩემს შეყვარებულს უნდოდა, რომ ყველაზე მაგარი, ლამაზი და წარმატებული გოგო ვყოფილიყავი და მინდა, ეს მოლოდინი გავამართლო.
