მიშო სულუხია: კრიტიკისთვის მზად ვიყავი. ჩემმა მენტორმა გადაწყვიტა, „X ფაქტორის“ სცენაზე ბაროკოს მუსიკალური სპეციფიკური მიმართულება გამოეტანა. გვეგონა, რომ ამას უმრავლესობა ვერ გაიგებდა, თუმცა ყველა ყველაფერს კარგად მიხვდა, უბრალოდ, გაბუნიამ მისთვის დამახასიათებელი კომენტარი გააკეთა და მისგან ეს არც გამკვირვებია. გიორგის თქმით, საუკუნეების წინათ მამაკაცებს კასტრაციას უკეთებდნენ, რომ ასეთი ხმა ჰქონოდათ, მიშოს კი ბუნებრივად აქვსო. ამიტომ, გაბუნიას კრიტიკა შეიძლება, კომპლიმენტადაც მიმეღო. არ მომწონს, როცა ჟიურის წევრები ჩემ გამო კამათობენ, რაც ხშირად ხდება. ეს არ იყო დაკოდილი მამაკაცის სიმღერა. კონტრტენორის შესასრულებელი პარტია გახლავთ, რასაც, ვფიქრობ, თავი კარგად გავართვი. ნიკამ რომ მითხრა, ამოიღე და გიორგის წინ დაუდეო, უხერხულობა კი არ მიგრძნია, ძალიან გამეცინა. დარწმუნებული ვარ, მაყურებლებმაც, დარბაზშიც და ტელეეკრანებთანაც, ბევრი იცინეს.