ლევან ლაზარიშვილი: ლაივებზე დათუნას ყოველთვის ცოტა ხმა ჰქონდა და ველოდი, რომ პროექტს დატოვებდა. აუტსაიდერი რამდენჯერმე იყო და მესამედაც რომ გადაერჩინათ მენტორებს, გავაპროტესტებდი. რეპეტიციებისგან თავისუფალი რომ არის, მიხარია. რაც მთავარია, გამოცდილება მიიღო. გარდატეხის ასაკამდე შეუძლია, იმღეროს, საკუთარ თავზე იმუშაოს. თუ სიმღერა ასე ძალიან უყვარს, გვერდით დავუდგები.
რაც შეეხება ნიკა გვარამიას კრიტიკას, დათუნა არ ფიქრობს, რომ ამით ცხოვრება დამთავრდა. პირადად მე ჩემს შვილთან შენიშვნები არ მაქვს. კარგად იმღერა, პროექტის დიდი მადლობელი ვარ და მინდა, ყველას დიდი მადლობა გადავუხადო, ვინც დათუნას წარმატებაში პატარა წვლილი მაინც შეიტანა. მართალია, ნიკა გვარამიამ დათუნა რამდენიმე ლაივკონცერტზე გააკრიტიკა, მაგრამ როგორ შეიძლება, ამის გამო მის მიმართ აგრესია მქონდეს? პროექტს მთლიანობაში ვუყურებდი. როდის რა გაკეთდა და დათუნას როგორი გამოსვლები ჰქონდა. ბავშვის სტაბილურობით ძალიან კმაყოფილი ვარ. ეს მისი მაქსიმუმი იყო. 12 წლის ბავშვი ნახევარფინალამდე რომ მოვიდა, უკვე გამარჯვებაა.