- რა არის თქვენთვის სრულყოფილი ბედნიერება?
- როდესაც უყვარხარ და გიყვარს.
- ბოლოს როდის გაიცინეთ?
- საერთოდ, ხშირად ვიღიმი. ბოლოს დღეს გავიცინე, ტაქსიში, აქ რომ მოვიდოდი.
- ბოლოს როდის იტირეთ?
- იშვიათად ვტიროდი ხოლმე, მაგრამ ბოლო დროს ემოციური გავხდი, თითქოს ყველაფერზე მეტირება.
- თქვენი ხასიათის მთავარი შტრიხი?
- პრინციპულობა.
- ყველაზე დიდი ნაკლი?
- უხეშად პირდაპირი ვარ, რაც არ მომწონს.
- ყველაზე მეტად რომელ ისტორიულ ფიგურასთან აიგივებთ თავს?
- არავისთან... რომელიმე ისტორიულ გმირთან თავის გაიგივება ზედმეტად ტრივიალური მეჩვენება.
- ვინ არიან თქვენი გმირები დღეს?
- ალბათ, ყველა დედა, ვინც შვილს უმამოდ ზრდის. დედაჩემმა უმამოდ გამზარდა და მიმაჩნია, რომ ეს ძალიან რთულია.
- თქვენი მხატვრული გმირები?
- სხვადასხვა დროს სხვადასხვა მხატვრული გმირი მყავს. მაგალითად, თუ კონკრეტულ წიგნს ვკითხულობ, იმ მომენტში იმ წიგნიდან მყავს ფავორიტი. ამწუთას, რატომღაც, ოსკარ უაილდის დორეან გრეი მახსენდება.
- ყველაზე შთამბეჭდავი მოგზაურობა?
- შთამბეჭდავი მგონია, ჯერ კიდევ წინ არის, მაგრამ ბოლოს ყველაზე შთამბეჭდავი იყო გერმანიაში, მიუნხენში მოგზაურობა, სადაც Coldplay-ს კონცერტს დავესწარი.
- თვისება, რომელსაც უპირატესობას ანიჭებთ მამაკაცში?
- ერთგულება.
- ქალში?
- საკუთარი თავის პატივისცემა.
- საყვარელი მწერლები?
- ოსკარ უაილდი.
- საყვარელი კომპოზიტორი?
- გია ყანჩელი, ფრიდერიკ შოპენი, ვოლფგანგ ამადეუს მოცარტი.
- ფილმი?
- გამორჩეულად საყვარელი ფილმი არ მაქვს, ყოველ შემთხვევაში, ახლა ვერ ვიხსენებ...
- რას მიიჩნევთ თქვენს ყველაზე დიდ მიღწევად?
- ალბათ, იმას, რასაც დღეს ვაკეთებ. ვარ იქ, სადაც მინდა, რომ ვიყო.
- რა არის თქვენთვის ყველაზე ძვირფასი?
- დედა.
- თარიღი, რომელსაც თქვენი ცხოვრებიდან გამოტოვებდით?
- კი, არსებობს. ეს იყო ხუთი წლის წინათ, 15 ივნისი.
- რა არის თქვენთვის სამშობლო?
- სამშობლო? სამშობლო არის ღირებულებები, ტრადიციები და პატარა ოჯახი, სადაც ყოველთვის მიხარია ყოფნა.
- რისი გეშინიათ ყველაზე მეტად?
- მარტოობის.
- როგორ ისურვებდით სიკვდილს?
- სამსახურებრივი მოვალეობის შესრულების დროს.
- თუკი ოდესმე ღმერთს შეხვდებოდით, რას ისურვებდით, რომ თქვენთვის ეთქვა?
- ძალიან მაგარი გოგო ხარ!