კონფუცი: 60 წლისამ ვისწავლე სიმართლის გარჩევა სიცრუისგან

კუნი სამი წლის იყო, როდესაც მამა გარდაეცვალა. დედამ სიცოცხლე შვილის აღზრდას მიუძღვნა, რომლის დიდებული მომავლიც სიზმარში ჰქონდა ნანახი.

კონფუციმ წინასწარმეტყველების ნიჭი და ყველასგან გამორჩეული უნარები ადრეულ ბავშვობაში გამოავლინა. შვიდი წლის ასაკში სკოლაში შეიყვანეს. ამის შენდეგ ბიჭუნა ბევრს კითხულობდა და თვითგანათლებას ეწეოდა.

17 წლის ასაკში კუნი მეფის მთავრობის წარმომადგენელი გახლდათ.

როგორც კი ახალგაზრდა ბრძენის შესახებ შეიტყო, ლუს მეფემ ის დედაქალაქში მიიწვია. 25 წლის კონფუციმ მოგზაურობის დროს საკუთარი სკოლის გახსნა გადაწყვიტა, რათა ტრადიციული სწავლებების საფუძველზე საზოგადოებისთვის სასარგებლო ადამიანები აღეზარდა.

მალე ძი (ანუ მასწავლებელი - ასე მოიხსენებდნენ უდიდეს ჩინელს მისი თანამედროვეები) იუსტიციის მინისტრად დაინიშნა, რასაც სამეფოს აყვავება მოჰყვა, მაგრამ ცილისწამებამ აიძულა, სახლი დაეტოვებინა. ბრძენმა მთელს იმპერიაში მოგზაურობა დაიწყო, თავისი ცოდნას და გამოცდილებას ყველას უზიარებდა - მათხოვრებსა და მთავრებს, გლეხებს და მმართველებს, მოხუცებსა და ახალგაზრდებს.

საკუთარ ცხოვრებას კი კონფუცი ასე მოკლედ აღწერდა:

15 წლისამ - გონება სწავლაზე გადავრთე;

30 წლისამ - მყარი საფუძველი გავიკეთე;

40 წლისამ - ეჭვებს თავი დავაღწიე;

50 წლისამ - შევიმეცნე ზეცის ნება;

60 წლისამ - ვისწავლე სიმართლის გარჩევა სიცრუისგან;

70 წლისამ - დავიწყე გულისთქმის აყოლა.

კონფუციმ საკუთარი სიკვდილი იწინასწარმეტყველა, რომელმაც ძვ. წ. 479 წელს უწია.

ჩინელი ფილოსოფოსის სწავლებამ დიდი გავლენა იქონია ჩინეთსა და აღმოსავლეთ აზიაზე. კონფუციანელობა მსოფლიოს ერთ-ერთი უდიდესი ფილოსოფიაა, მისი დამფუძნებლის ბრძნული გამონათქვამები კი ჩვენს დროშიც ფასეულია:

1. თუ გძულს, ესე იგი, დაგამარცხეს;

2. ადრე ადამიანი სწავლობდა სრულყოფილების მისაღწევად, ახლა სწავლობს - სხვების გასაოცებლად;

3. წვრილმანებში თავშეუკავებლობა დიდ საქმეს დაღუპავს;

4. ნუ გაუკეთებ სხვას იმას, რასაც საკუთარ თავს არ უსურვებ;

5. მას, ვინც არ ფიქრობს მომავალ პრობლემებზე, აუცილებლად ელოდება უახლოესი უსიამოვნებები;

6. კეთილშობილი სულის ადამიანი მუდამ მშვიდია, მდაბიო სულის - ყოველთვის შეწუხებული;

7. დაარიგე მხოლოდ ის ცოდნის მაძიებელი, ვინც თავისი უვიცობა აღმოაჩინა;

8. ქვეყანაში, სადაც წესრიგია, თამამი იყავი მოქმედებაში და სიტყვაში. ქვეყანაში, სადაც წესრიგი არ არის, თამამი იყავი მოქმედებაში და დაუკვირდი სიტყვას;

9. ბრძენმა არ იცის მღელვარება, ჰუმანურმა არ იცის წუხილი, მამაცმა არ იცის შიში;

10. სანამ შურს იძიებ, ორი საფლავი გათხარე.