მთავარი რჩევა - ისე მოვიქცეთ, რომ გველმა არ გვიკბინოს. ამიტომ ბალახიან ადგილებში სასურველია დახურული ფეხსაცმლით სიარული. დააკვირდით, სად მიდიხართ ან რა ადგილას ჯდებით. თუკი გველს დაინახავთ - ნუ გამოიწვევთ მას, რადგან, როგორც კი გველს საფრთხე ემუქრება, ის თავდასხმაზე გადადის.
მიმართეთ სპეციალისტებს დასახმარებლად
თუკი გველმა მაინც გიკბინათ, არ ჩავარდეთ პანიკაში. რაც შეიძლება სწრაფად დარეკეთ გადაუდებელი დახმარების განყოფილებაში და მიეცით მათ მაქსიმალური ინფორმაცია გველის აღწერილობის შესახებ, რათა სპეციალისტებმა შეძლონ საჭირო შხამსაწინააღმდეგო საშუალების შერჩევა.
არ გაინძრეთ
თუკი გველმა გიკბინათ, აქტიური მოძრაობა არ შეიძლება, რადგან მოძრაობის დროს შხამი ორგანიზმში სწრაფად ვრცელდება. ამავე მიზეზით კარგი იქნება, თუკი შეძლებთ ნაკბენ ადგილზე ხელის დაჭერას. მოიხსენით სამკაულები, გაიხადეთ ტანისამოსი, რათა სისხლის ცირკულაცია არ დაიბლოკოს.
არ გამოიყენოთ „ჟგუტი“
ამ დროსაც ორგანიზმში სისხლის მიმოქცევა დაიბლოკება და შხამი ერთ ადგილას დაგროვდება. შედეგად კი ამპუტაციის რისკი დიდია. არ გამოწოვოთ შხამი პირით, რადგან მომწამვლელი ნივთიერება შესაძლოა, მოხვდეს პირში და უფრო სწრაფად გავრცელდეს მთელ სხეულში.
არ გამოიყენოთ ყინული
ყინულმა შესაძლოა, სისხლის მიმოქცევა შეანელოს ან კანის ქსოვილის გაყინვა გამოიწვიოს. ამ შემთხვევაშიც, ამპუტაცია გარდაუვალია. თუკი შესაძლებლობა გექნებათ, ჩამოიბანეთ ჭრილობა სუფთა წყლით და დაელოდეთ ექიმის მოსვლას. დალიეთ ბევრი წყალი. სპეციალისტები ამტკიცებენ, რომ გველის ნაკბენის დროს წყლის მიღებით ორგანიზმიდან შხამი სწრაფად გამოიყოფა.
