გიორგი პაპკიაური: ხალხი ბევრს წერს და აღნიშნავს იმას, რომ მაგდა პროფესიონალი მომღერალია და კონკურსში აღარაფერი ესაქმება. ამიტომ ველოდი, რომ აუტსაიდერებში მოხვდებოდა, რაც ძალიან ცუდი შეგრძნებაა. ჟიურის მხარდაჭერის იმედი ნამდვილად მქონდა, რადგან, თუ გემოვნებიან მუსიკასა და ვოკალზე ვსაუბრობთ, სხვაგვარად ვერც წარმომედგინა, თუმცა გული დამწყდა იმაზე, რომ პროექტი მერაბ ამზოევმა დატოვა.
მე და მაგდა ერთმანეთს ვავსებთ. სცენაზე გასვლის წინ რჩევებს ყოველთვის ვაძლევ. ჩემმა ცოლმა თავის დროზე თავს სიმღერით, ვოკალით მომხიბლა. მაგდა ისეთი ქალია, რომელიც ნებისმიერ მამაკაცს მოხიბლავს, მაგრამ ის უკვე ჩემია.
- აღნიშნავთ, რომ სცენაზე გასვლის წინ მაგდას რჩევებს აძლევთ. თქვენ რას საქმიანობთ?
- ქართულ ჯაზს მივდევ. მუსიკას ვწერ. სხვადასხვა კლუბებსა და ბარებში ვმღერი. ჩემს ჯგუფთან art face-თან ერთად საკმაოდ წარმატებული გამოსვლები მაქვს. გაპიარებული არ ვარ, მაგრამ ჩემთვის მთავარი ის არის, რომ გემოვნებიან მუსიკას ვქმნი.